Tatangkap Papuyu Bagincu

 

TATANGKAP PAPUYU BAGINCU

Salamiyah

 

Udin nang marantau di banua urang mancari duit gasan sasandaan balukar kuitan. Satahunan kada ada babulikan ka kampung, awak kurus karing kada ada nang mamasak akan. Si Udin taungut saurangan di muka lawang, kada lawas amat mandatangi.

“Din, kita makanan nah di warung gadis nang langkar samalam” ujar Amat mambawai

“Kada gin mat ai, liyur ku handak mamakan masakan kampung nah,” ujar Udin manyahuti

“Nah mat ai, sama aku asa handak jua mamakan iwak di kampung… mahayal-hayal aku mamakan papuyu babanam bacacapan,” ujar Amat sambil managuk liyur

“Mun kaya nintu kita baunjunan papuyu nah di sungai parak rumah pambakal,” ujar Udin sambil bapuat maambil umpan

“Ih lajui dah, aku injami unjunnya lah,” ujar Amat pulang

“Hiih ayuha, kita mambanam papuyu,” ujar Udin sambil membawa unjun

 

Wayah ngini sabarataan sungai rata-rata tarcamar sudah, nang limbah pabrik gin dibuangnya ka sungai. Nah ada jua nang manusianya nih pina bahimat maambili iwak disatrumi lawan nang diubati sungainya. Kalakuan kakaya ngini nang marusak ekusistem sungai.

Parak tiga jam si Udin lawan amat maunjunan mancari papuyu.

“Umaa din, kita bulikkan gin dulu nah parak zuhur sudah arinya… ampihan ja kada ada dapat jua iwaknya,” ujar Amat sambil garunum-garunum kada dapat iwak

“Hiih mat ai, aku mun kaya ngini handak bulik ja dulu ka kampung nah salajur manjanguk kuitan lawan mambayari sasandaan balukar,” ujar Udin sambil basisimpun unjun

“Nah baik ai mun kaya itu, kaina baunjun ikamlah di kampung krimi aku pakasamnya,” ujar Amat pulang sambil takurihing

“Inggih, kaina ku krimi satuples,” ujar Udin manyahuti

***

Nang ngarannya kuitan bahagia banar anaknya bulik dari parantauan. Sungai di kampung ngini masih banyak baisi iwak, urang-urangnya kada bisa baracun-racunan nang marusak ekusistem sungai. Hari ini si Udin handak tulak mancari iwak papuyu di parak pahumaan sambil jua mangawani kuitan mananam banih. Sajam banyak ai dapat papuyunya, kada lawas dikiau mama disuruh marukui ka pahumaan. Pas parak ka pahumaan kuitan, ada binian mengiau...

“Din lo, pabila datang ikam ka sini,” ujar Binian sambil bejalan jua handak ka pahumaan

“Hanyar samalam datangnya, ikam si Aluh nang kawan ku bahari di SD, iya lah?,” ujar Udin Panasaran

“Hiih, aku aluh kawan ikam bahari... ni aku handak ka pahumaan mama ikam, aku manggini mananjang di situ,” ujar Aluh pulang

“Ih salajur ai nah kita baimbai,” ujar Udin sambil takurihing

***

Malam harinya, Udin bapadah lawan kuitan mun handak lawan si Aluh. Ngarannya kuitan katuju haja jua lawan Aluh jadi dirastui haja, mandangar dirastui kuitan sanang banar hati Udin. Nang awal mancari papuyu gasan mamakasamkan si Amat, tatamu jua papuyu bagincu nang langkar gasan dijadi akan bini. Kada lawas imbah bapandiran si Abah manakuni.

“Isuk kah kita badatang ka rumah Aluh, pakai ja dulu duit nang gasan manabusi sandaan balukar,” ujar Abah

“Uma bah jangan dipakai duit gasan balukar ngintu,” ujar Udin manyahuti

“Kada, pakai haja duit itu napang lagi gasan anak. Aku kada handak mun ikam sampai kada karuan lawan anak urang, baik bakakawinan ja salajur” Ujar Abah sambil manuduhi Udin

“Inggih bah, makasih banyak abah lawan mama” ujar Udin sambil mandangarkan

***